Wenger ameamua, apeleka ofa ya tatu Liverpool

Kocha wa Arsenal, Arsene Wenger amesimamia msimamo wake kwamba safari hii atabadilika kwenye sera ya usajili kwa kusajili wachezaji wenye majina kwa pesa nyingi. Maneno hayo ya Wenger yameshathibika baada ya kuonesha nia ya kumsajili Suarez, Rooney au Higuain. Mbali ya kuwa usajili wa wachezaji hawa kuwa mgumu lakini Wenger ameendelea kushinikiza uongozi wa klabu yake kumsajili mchezaji mmojawapo. Arsenal ilianza kwa Rooney mambo yakawa magumu na Higuain vilevile, lakini kwasasa Arsenal inajitahidi iwezavyo kukamilisha usajili wa mshambuliaji wa Liverpool Luis Suarez. Mara ya kwanza Arsenal ilituma ofa kwa Liverpool ya paundi mil 30 na mara ya pili paundi mil 35 lakini zote zilikataliwa, na mara hii kama ilivyonukuliwa na Sportsmail, kocha wa Arsenal, Arsene Wenger amekubali kutuma ofa kwa mara ya tatu ya paundi mil 42 kwa Liverpool ili kukamilisha usajili wa Suarez, ofa ambayo inasemekana inaweza kukubaliwa na Liverpool. Arsenal wanatarajia kupokea majibu ya ofa hii ndani ya siku chache, baada ya Liverpool kuanza kuonesha nia ya kumuuza mchezaji huyu. Klabu ya Arsenal imefikia hatua hii, baada ya Man utd kumzuia Rooney asijiunge na Arsenal, wakati Higuain pia akiwa kwenye hatua za mwisho kujiunga na Napoli.