Nitawabembeleza Essien na Boateng - Appiah

Kocha wa timu ya taifa ya Ghana Kwesi Appiah yupo kwenye wakati mgumu kuwashawishi Kevin Prince Boateng na Michael Essien warudi kwenye kikosi cha timu ya Taifa ili kuongeza nguvu kwenye kikosi cha Ghana kinachopigania nafasi moja kati ya tano kutoka nchi za Afrika kwenye michuano ya kombe la dunia mwakani nchini Brazil. Boateng na Essien waliojitoa kwenye timu ya taifa kwa madai ya sababu za kiafya mwaka 2011, kwasasa wanaonekana kuwa “fiti” kiafya lakini hawajawa tayari kuichezea Ghana. Kocha wa Ghana Appiah amesema yupo tayari kuwabembeleza wachezaji hao hadi dakika za mwisho kwani ni wachezaji anaowahitaji kipindi hiki ili kuimarisha timu yake. Appiah alisema “ Essien na Boateng ni wachezaji wazuri, ila kwasasa hawapo tayari kucheza timu ya taifa, lakini mimi nitawafuata huko walipo kuongea nao ili warudi, naamini nitafanikiwa na timu yangu itaimarika’. Lakini uchambuzi unaonesha nchi za Ulaya na Amerika wachezaji wao wanajisikia fahari kucheza kwenye timu za taifa kitu ambacho ni tofauti kwa wachezaji wa Afrika, hii ni kutokana na matunzo mabaya kwa wachezaji wa timu za taifa Afrika lakini pia wachezaji wa Afrika hawana utaifa kwa mataifa yao.