Wachezaji wa 5 wanaotarajia kuziba pengo la Suarez

Ikiwa kwenye harakati za kujiandaa kumuuza Luis Suarez, klabu ya Liverpool imeshaanza kutafuta wachezaji mbadala watakaoweza kuziba pengo la Suarez. Wachezaji watano waliotajwa hapo chini ndiyo waliotajwa hadi sasa na vyombo vya habari mbalimbali nchini Uingereza kuwa kwenye rada ya klabu ya Liverpool na tayari wachezaji baadhi yao wameshaanza mazungumzo ya mwanzo. Wachezaji hao ni kama wafuatao; 

Jackson Martinez 

Martinez anachezea klabu ya Porto, na msimu uliopita alicheza mechi 30 na kufunga magoli 26. Martinez alitajwa kuwa moja kati ya wafungaji bora wa Ulaya kwa msimu uliopita. Hadi sasa ni klabu ya Liverpool na Napoli ndiyo wameonesha nia ya kumsajili mchezaji huyu. Martinez ni chaguo namba mbili baada ya Soldado kwa klabu ya Liverpool kwani uwezo wa mchezaji huyu ni mkubwa na umri wake bado unadai.  

Luis Muriel 

Muriel ni mchezaji wa Udinese ya Italia, msimu uliopita alifanikiwa kufunga magoli 11. Muriel mwenye miaka 22 ameonesha nia ya kwenda Liverpool lakini ameonekana kuwa itachukua muda ili aweze kucheza kwenye kiwango kinachohitajika licha ya kuwa Liverpool italipa fedha kidogo ili kumpata mchezaji huyu kwani bado mchezaji kinda ambaye ataweza kuwa mchezaji mzuri zaidi miaka ijayo. 

Roberto Soldado 

Soldado ndiye chaguo namba moja la Liverpool kati ya wachezai wote watano wanaotarajiwa kusajiliwa kuziba pengo la Suarez. Soldado anayechezea klabu ya Valencia ameshafunga magoli 81 kati ya mechi 141 alizocheza. Kwasasa mchezaji huyu ni moja kati ya washambuliaji tegemezi wa Hispania ambao ni mabingwa wa Ulaya na Dunia. Klabu ya Tottenham na Liverpool ndiyo zimeonesha nia ya kumsajili Soldado. Valencia imesema ipo tayari kumuuza Soldado lakini kwa dau lisilopungua paundi mil 26, na tayari klabu ya Liverpool imeshaanza mazungumzo ya kumsajili Soldado. 

Oscar Cardozo

Cardozo ni raia wa Paraguay anayechezea klabu ya Benfica Ureno. Cardozo alijiunga na Benfica mwaka 2007 na hadi sasa ameshacheza mechi 160 na kufunga magoli 105. Klabu ya Benfica imeonesha nia ya kumuuza mshambuliaji wake kwa klabu za Cardiff city na Fenerbahce ambazo zilionesha nia ya kumhitaji kwa paundi mil 15, lakini ujio wa Liverpool kwenye kinyang’anyiro hiki kunaweza kuzipotezea lengo klabu za Cardiff na Fenerbahce. Cardozo ametajwa kuwa ni chaguo la tatu baada ya Soldado na Martinez. 

Fred 

Fred ni mshambuliaji wa Brazil na Fluminense, anajulikana uwezo wake kupitia timu ya taifa ya Brazil, kwani yeye ndiye mfungaji wa mwisho wa timu ya taifa. Mshambuliaji huyu ndiye aliyetajwa kuwa wa bei rahisi kuliko wote ambao klabu ya Liverpool inaweza kuwasajili. Klabu yake ya Fluminense imesema itahitaji kiasi cha paundi mil 2 tu kutoka kwa Liverpool tofauti na washambuaji wengine.